សាវតារ

ផ្នែក​អប់រំ​ នៃ​វិទ្យាស្ថាន​បណ្ដុះបណ្ដាល​ និង​ស្រាវជ្រាវ​ដើម្បី​អភិវឌ្ឃន៍​កម្ពុជា​ (CDRI​) ​ត្រូវបា​នបង្កើត​ឡើង​ក្នុង​ឆ្នាំ​២០១៥ ​ដើម្បី​ប្រមែ​ប្រមូល​​ជំនួយ​ និងការ​ឧបត្ថម្ភ​នានា​​​ឲ្យ​នៅ​មួយ​កន្លែង​ដើម្បីបម្រើ​​ដល់​ការស្រាវជ្រាវ​ដែ​លប្រកប​ទៅ​ដោយ​នវានុវត្តភាព​ ជាមួយនឹង​សក្ដានុពលធ្វើការ​​កែលម្អ​ការអប់រំ និង​ការបណ្ដុះបណ្ដាល​នៅ​ប្រទេស​កម្ពុជា។​ ដើម្បី​ឥទ្ធិពល និង​ប្រសិទ្ធភាពជា​អតិបរមា​​នៃ​ការស្រាវជ្រាវ និង​កិច្ចសន្ទនា​គោល​នយោបាយអប់រំ ផ្នែក​អប់រំ​បាន​ធ្វើការ​លើ​ការទំនាក់ទំនង និងការ​​ជជែកពិគ្រោះ​ជាមួ​យ​នឹង​ក្រសួង​អប់រំ​ យុវជន​ និង​កីឡា ​រួមមាន​អគ្គ​នាយកដ្ឋានឧត្តមសិក្សា​ ក្រសួ​ង​ការងារ និង​បណ្ដុះបណ្ដាល​វិជ្ជាជីវៈ រួមមានអគ្គនាយកដ្ឋានអប់រំ ​ បណ្ដុះបណ្ដាល​បច្ចេកទេស និង​​វិជ្ជាជីវៈ ក៏ដូចជា​ក្រសួង​ទេសចរណ៍ផងដែរ​។ វិស័យ​ស្នូល​នៃ​ការផ្តោតការយកចិត្តទុកដាក់​​រួមមាន​កំណែទម្រង់​ប្រព័ន្ធ​អប់រំ​ ការអប់រំ​ និង​ការបណ្ដុះបណ្ដាលបច្ចេកទេស និង​​វិជ្ជាជីវៈ និង​គុណ​ភាព​ការបង្រៀន​ និង​ការរៀន។

ផ្នែកអប់រំ ធ្វើការ​ដើម្បី​រកដំណោះស្រាយ​លើ​​បញ្ហា​ដែលប្រឈម​ដោយ​ឧត្តមសិក្សានៅ​​កម្ពុជា (HE) និង​ការអប់រំ និង​ការបណ្ដុះបណ្ដាល​បច្ចេកទេស និង​​វិជ្ជាជីវៈ (TVET)។ ជាមួយ​នឹង​ការ​គាំទ្រពី​ដៃគូ​អភិវឌ្ឍន៍​ចំនួន​បួន រួមមាន​ទីភ្នាក់ងារ​កិច្ច​​សហប្រតិបត្តិការ​អភិវឌ្ឍ​អន្តរជាតិ​ស៊ុយអែត (SIDA) ទីភ្នាក់ងារ​ស្វីស​សម្រាប់​ការ​អភិវឌ្ឍ និង​កិច្ចសហប្រតិបត្តិការ​ (SDC) ជំនួយពិសេស​នៃ​កិច្ច​សហប្រតិបត្តិការឡានឆាង-មេគង្គ (Lancang-Mekong) និង​ ក្រសួង​ការបរទេស និង​ជំនួញ​នៃ​ប្រទេស​អូស្ត្រាលី​ (DFAT) តាមរយៈមូលនិធិអាស៊ី (TAF) ប្រធានបទ​ស្រាវជ្រាវ​នៃ​ផ្នែក​អប់រំ​រួម​មាន​ជាអាទិ៍ ​ការអប់រំ​ផ្នែក​ STEM អភិបាលកិច្ច និង​ហិរញ្ញប្បទាន​នៅ​ឧត្តម​សិក្សា ការទាក់ទាញ​អ្នក​មាន​ទេពកោសល្យពី​បរទេស​នៅ​ឧត្តម​សិក្សា​ ភាពជាដៃគូ​នៃ​វិស័យសាធារណៈ​ និង​ឯកជនសម្រាប់​ TVET និង​នវានុវត្ដន៍​នៃ​ការអប់រំ និង​ការបណ្ដុះបណ្ដាល។

សកម្មភាព​ចម្បងៗ​របស់ផ្នែកអប់រំ

ចាប់តាំងពីការកកើត​ដំបូង​របស់ខ្លួន​មក ផ្នែក​អប់រំ​ នៃ​វិទ្យាស្ថាន​បណ្ដុះបណ្ដាល​ និង​ស្រាវជ្រាវ​ដើម្បី​អភិវឌ្ឃន៍​កម្ពុជា​ (CDRI​) បានធ្វើការ​យ៉ាង​ឈ្មុះឈ្មុល​ក្នុងការធ្វើការ​ស្រាវជ្រាវ​ របៀបជាព័ត៌មាន​សម្រាប់​​ធ្វើ​​គោលនយោបាយ​ ដោយ​ផ្ដោត​លើ​ការអប់រំ​ក្រោយ​មធ្យមសិក្សា ទាំង​ផ្នែក​វិជ្ជាជីវៈ និង​ការអប់រំ​ផ្លូវការ ហើយ​ក៏បាន​​ចូលរួម​ជះឥទ្ធិពល​លើ​ការសម្រេចចិត្ត​ធ្វើ​គោល​នយោបាយ​ជាមួយ​នឹង​ភស្តុតាង​ស្រាវជ្រាវ​របស់ខ្លួនផងដែរ។ ផ្នែកអប់រំ​បាន​ចូលរួម​ក្នុង​សមិទ្ធិផល​បោះពុម្ព​ផ្សាយ​នានាប្រចាំ​ស្ថាប័ន​រួមមាន​ Working Paper Series សង្ខេប​គោលនយោបាយ (Policy Brief) និងទស្សនាវដ្តី​អភិវឌ្ឍ​កម្ពុជា​ (Cambodia Development Review) ប្រចាំ​ត្រីមាស ក៏ដូចជា​ទនិ្ននុប្បវត្តិ​អន្តរជាតិផងដែរ។​ ស្នាដៃ​ដែល​គួរឲ្យ​កត់សម្កាល់​មួយចំនួន​របស់​​ផ្នែក​អប់រំ​ក្នុងឆ្នាំ ២០១៩ រួមមាន​​អត្ថបទ “កត្តា​ទំនាក់ទំនង​នៃការជ្រើសរើស​មុខជំនាញ STEM​” (Research in Science & Technological Education Journal) និង​ “ប្រព័ន្ធ​អេកូឡូស៊ី​នវានុវត្តន៍ និង​សហគ្រិនភាពនៅ​ប្រទេស​កម្ពុជា៖ តួនាទី​នៃ​ស្ថាប័នអប់រំ”​​ (CDRI Working Paper Series)។ ការស្រាវជ្រាវ​ដែល​ផលិតបាន​​ក៏ត្រូវបាន​ផ្សព្វផ្សាយ​ទៅកាន់​អ្នក​ធ្វើគោលនយោបាយ និង​ភាគី​ពាក់ព័ន្ធ​ដទៃ​ទៀត​តាមរយៈ​វេទិកា និង​សន្និសិទនានា​ដែល​ធ្វើឡើង​ជាប្រចាំ ដើម្បី​ជា​មូលដ្ឋាន​សម្រាប់​កិច្ច​សន្ទនា​ និង​ការពិភាក្សា​គោលនយោបាយ​លើបញ្ហា​ដែល​ពាក់ព័ន្ធ។ ក្រៅពី​ការ​ធ្វើការ​ស្រាវជ្រាវ និង​រៀបចំ​កិច្ច​សន្ទនា​គោល​នយោបាយ​ហើយ ផ្នែក​អប់រំ​ក៏​ចូលរួម​យ៉ាង​សកម្ម​ផងដែរ​ក្នុង​ការ​ផ្ដល់​ការ​បណ្ដុះបណ្ដាល​បច្ចេកទេស​ទៅ​ដល់​បុគ្គលិក CDRI និង​ដៃគូ ​តាមរយៈ​​សិក្ខាសាលា​បណ្ដុះបណ្ដាល ការផ្លាស់ប្ដូរ​បទពិសោធន៍​ស្រាវជ្រាវ និង​ការធ្វើទស្សនកិច្ច​អន្តរជាតិ និង​កម្មសិក្សា​ផងដែរ។​

ភាពជា​ដៃគូនៅក្នុងគម្រោង​«ពន្លកចំណេះ»

នៅក្រោម​ពន្លក​ចំណេះ ផ្នែកអប់រំនឹងផ្តោតទៅលើការពង្រឹងសមត្ថភាពស្ថាប័ន និងបច្ចេកទេស ព្រមទាំងបន្តការស្រាវជ្រាវរបស់ខ្លួន។ កម្មវិធី​ជា​ដៃគូនេះ​ត្រូវបាន​ឲ្យឈ្មោះ​ថា៖ “​ថ្នាល​ឧត្តមចំណេះ៖ ការលើកកម្ពស់​​នវានុវត្ដន៍នៃឧត្តមសិក្សា​​នៅ​កម្ពុជា”។

សូមចុចត្រង់នេះ ដើម្បីស្វែងយល់បន្ថែមអំពី វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា។