កិច្ចពិភាក្សាចែករំលែក

កម្មវិធីពន្លកចំណេះរីករាយក្នុងការចែករំលែកអំពីទស្សនៈ និងបទពិសោធន៍របស់លោកស្រី ខៀវ ភិរម្យ  អ្នកស្រាវជ្រាវមកពី វិទ្យាស្ថានបណ្តុះបណ្តាល និង​ស្រាវជ្រាវ ដើម្បីអភិវឌ្ឍន៍កម្ពុជា (CDRI) និងសមាជិកនៃបណ្តាញស្ត្រីក្នុងវិស័យស្រាវជ្រាវ (SheThinks Network) ដែលបានចូលរួមក្នុងសន្និសីទ Australasian AID Conference ២០២៥។  

លោកស្រី ភិរម្យ បានធ្វើបទបង្ហាញអំពីការស្រាវជ្រាវស្តីពី៖ «ការវាយតម្លៃផលប៉ះពាល់នៃគម្រោង AGROW នៅកម្ពុជា៖ ការយល់ដឹងអំពីវិធីសាស្រ្តចម្រុះ»ដែលបានលើកឡើងពីការអភិវឌ្ឍជនបទប្រកបដោយបរិយាបន្ននៅកម្រិតតំបន់ ដោយយកបទពិសោធន៍ពីបណ្តាប្រទេសមកពិភាក្សា និងបង្ហាញពីសារៈសំខាន់នៃការយល់ដឹង និងការអនុវត្តលើលទ្ធផលស្រាវជ្រាវតាមបរិបទមូលដ្ឋាន។  

ក្នុងនាមជាអ្នកស្រាវជ្រាវស្រ្តីនៃបណ្តាញស្ត្រីក្នុងវិស័យស្រាវជ្រាវ SheThinks Network ដែលបានចូលរួមសន្និសីទនេះ លោកស្រី​ ភិរម្យ បានចូលរួមយ៉ាងសកម្មក្នុងវេទិកាពិភាក្សាជាច្រើន ដើម្បីពង្រឹងចំណេះដឹង ផ្លាស់ប្តូរមតិយោបល់ជាមួយអ្នកជំនាញអន្តរជាតិ។ លោកស្រីក៏បានចូលរួមវេទិកាពិភាក្សាអំពីការផ្លាស់ទីកម្លាំងពលកម្ម សន្តិសុខស្បៀង ការប្រែប្រួលអាកាសធាតុ ការវិភាគទិន្នន័យសម្រាប់ការអភិវឌ្ឍ សុខភាពសាធារណៈ និងកំណើនបរិយាប័ន្ន ព្រមទាំងវេទិកាគន្លឹះ ដែលបានផ្តល់ទស្សនៈដ៏មានតម្លៃពីអ្នករៀបចំគោលនយោបាយ អ្នកសិក្សា និងអ្នកអនុវត្តការអភិវឌ្ឍ។ 

លោកស្រី ភិរម្យ ក៏បានចងបណ្ដាញជាមួយអ្នកចូលរួមជាច្រើនដែលមានចំណាប់អារម្មណ៍លើការស្រាវជ្រាវអំពីកម្ពុជា រួមទាំងនាយកផ្នែកស្រាវជ្រាវ ពិនិត្យ និងវាយតម្លៃនៃ International Development in Greater Melbourne ដែលបានបង្ហាញចំណាប់អារម្មណ៍ក្នុងការបន្តពិភាក្សាអំពីកិច្ចសហការស្រាវជ្រាវនាពេលអនាគត។ 

កម្មវិធីពន្លកចំណេះមានមោទណភាពក្នុងការគាំទ្រដៃគូរបស់យើង ដើម្បីលើកស្ទួយការស្រាវជ្រាវរបស់កម្ពុជា និងចូលរួមក្នុងការពិភាក្សាគោលនយោបាយនៅលើឆាកអន្តរជាតិ។