ពហុព័ត៌មាន

យើងមានសេចក្តីរីករាយក្នុងការចេញផ្សាយបទសម្ភាសន៍ពិសេស ពីវេទិកាគោលនយោបាយថ្នាក់ខេត្ត របស់កម្មវិធីពន្លកចំណេះ ឆ្នាំ២០២៦។ នៅក្នុងបទសម្ភាសន៍ពិសេសទី២នេះ យើងខ្ញុំមានកិត្តិយសក្នុងការបង្ហាញការចូលរួមរបស់ លោកស្រី ឌឹម សុខធីតា សមាជិកក្រុមប្រឹក្សាឃុំប៉ាក់ខ្លង ខេត្តកោះកុង ដែលលោកស្រីចែករំលែកនូវបទពិសោធន៍ និងទស្សនទានដ៏មានតម្លៃជាមួយវេទិកានេះ។

ជាការឆ្លើយតបទៅនឹងសំណួរ “តាមរយៈទស្សនៈរបស់ឃុំ តើអ្វីជាបញ្ហាប្រឈម និងឱកាសសំខាន់ៗក្នុងការចូលរួមរបស់សហគមន៍ និងទិន្នន័យមូលដ្ឋាន នៅពេលធ្វើការសម្រេចចិត្តដែលប៉ះពាល់ដល់ជីវិតប្រចាំថ្ងៃរបស់ប្រជាជន?”
លោកស្រី ឌឹម សុខធីតា បានលើកឡើងពីផលលំបាកដែលមន្ត្រីឃុំបានជួបប្រទះ នៅពេលប្រជាពលរដ្ឋរវល់ជាមួយការងារ ឬមានភាពរារែកក្នុងការចូលរួម។ លោកស្រីបានពន្យល់ពីតួនាទីសំខាន់របស់មេភូមិ ក្នុងការធ្វើជាស្ពានចម្លង និងជាអ្នកសម្របសម្រួលដ៏គួរឱ្យទុកចិត្ត ដើម្បីជួយឱ្យការសម្ភាសន៍ និងការប្រមូលឯកសាររូបថតដែលជាតម្រូវការចាំបាច់ផ្លូវការ អាចប្រព្រឹត្តទៅបានដោយរលូន។

បន្ថែមពីនេះ លោកស្រីនេះបានបង្ហាញពីការយោគយល់ដែលត្រូវការជាចាំបាច់ នៅពេលចុះជួបជាមួយក្រុមជនងាយរងគ្រោះ រួមទាំងជនមានពិការភាពផងដែរ។ តាមរយៈការសហការជិតស្និទ្ធជាមួយសមាជិកគ្រួសារ ដើម្បីដោះស្រាយការយល់ច្រឡំផ្សេងៗ រដ្ឋបាលឃុំអាចធានាថាគ្រួសារទាំងនោះអាចទទួលបាននូវជំនួយសង្គមដ៏សំខាន់ៗពីរដ្ឋាភិបាល ដូចជាកញ្ចប់ឧបត្ថម្ភគ្រួសារកាន់បណ្ណសមធម៌ អាហាររូបករណ៍សម្រាប់សិស្សានុសិស្ស និងប្រាក់ឧបត្ថម្ភសម្រាប់ជនមានពិការភាព។ នេះឆ្លុះបញ្ចាំងពីការប្តេជ្ញាចិត្តរបស់វេទិកា ចំពោះកិច្ចពិភាក្សាប្រកបដោយបរិយាបន្ន និងដំណោះស្រាយជាក់ស្តែងសម្រាប់សហគមន៍នៅកម្ពុជា។

សូមរង់ចាំតាមដានវីដេអូពីបទសម្ភាសន៍ពិសេស ទី៣ នៅថ្ងៃស្អែក!

សូមចុចទីនេះដើម្បីទស្សនាបទសម្ភាសន៍!