ក្រសួងមហាផ្ទៃ

ចាប់ពីឆ្នាំ២០១៩នេះតទៅ ក្រសួងនឹងផ្តល់លេខកូដអត្តសញ្ញាណ១០ខ្ទង់ ទៅអោយប្រជាពលរដ្ឋកម្ពុជាគ្រប់រូប លេខកូដអត្តសញ្ញាណនេះអាចយកទៅប្រើប្រាស់បានដើម្បីចូលទៅប្រើសេវាសាធារណៈ ឬឯកជនណាមួយ។ លេខកូដអត្តសញ្ញាណថ្មីនេះនឹងត្រូវបានផ្តល់ឱ្យរាល់ពេលបុគ្គលម្នាក់ៗឈានដល់អាយុ១៥ឆ្នាំ​។ មិនតែប៉ុណ្ណោះ ក្រុមហ៊ុនឯកជនក៏អាចចូលទៅម៉ាស៊ីនបម្រើ(server)ដើម្បីឆែកប្រវត្តិរូបបានដែរ។ See original document here.

នៅចុងឆ្នាំ២០១៤ អនុក្រឹត្យលេខ២៨៥ ស្តីពីមុខងារជាជម្រើស ត្រូវបានអនុម័ត។ តាមរយៈមុខងារជាជម្រើសនេះ រដ្ឋបាលថ្នាក់ក្រោមជាតិមានសិទ្ធិជ្រើសរើស គ្រប់គ្រង រៀបចំ និងប្រតិបត្តិមុខងារជាជម្រើសនេះផ្អែកទៅតាមតម្រូវការរបស់ប្រជាពលរដ្ឋ។ ឯកសារបច្ចេកទេសត្រូវបានចេញកាលពីចុងឆ្នាំ២០១៥ ក្រុមប្រឹក្សាបានចាប់ផ្តើមប្រើប្រាស់ឱកាសនេះ។

ក្រសួងមហាផ្ទៃកំពុងបញ្ចប់បញ្ជីនៃសេវារដ្ឋបាលរបស់ក្រសួងពាក់ព័ន្ធដែលអាចត្រូវបាន​ដាក់អោយដំណើរការតាមច្រកចេញចូលតែមួយ។ ក្រសួងមហាផ្ទៃ និង គ.ជ.អ.ប បានចេញអនុក្រឹត្យមួយស្តីពីការបង្កើតយន្តការនៃសេវាច្រកចេញចូលតែមួយនៅថ្នាក់ឃុំ និងព្រាងប្រកាសស្តីពីការបង្កើតមជ្ឈមណ្ឌលច្រកចេញចូលតែមួយ។

ក្រុមការងារកំណែទម្រង់រដ្ឋបាលសាធារណៈរបស់ក្រសួងមហាផ្ទៃ ត្រូវបានបង្កើតឡើងដើម្បីសម្របសម្រួល​ ជម្រុញការអនុវត្ត តាមដាន និងវាយតម្លៃកម្មវិធី យុទ្ធសាស្រ្ត និងកំណែទម្រង់រដ្ឋបាលសាធារណៈរបស់ក្រសួងមហាផ្ទៃ និងរដ្ឋបាលថ្នាក់ក្រោមជាតិ ដូចដែលមានចែងនៅក្នុងផែនការកំណែទម្រង់រដ្ឋបាលសាធារណៈជាតិ​ ២០១៥-២០១៨។​ ការងារខ្លះរបស់ក្រុមការងារនេះរួមមានៈ សម្របសម្រួល គ្រប់គ្រង និងដឹកនាំកិច្ចការកំណែទម្រង់របស់ក្រសួងមហាផ្ទៃ និងរដ្ឋបាលថ្នាក់ក្រោមជាតិ។ រៀបចំផែនការកំណែទម្រង់។​ តាមដាន​ រាយការណ៍ និងវាយតម្លៃដំណើរការកំណែទម្រង់។​

ក្រសួងអប់រំ​ យុវជន និងកីឡា បានផ្ទេរមុខងារ​ និងការគ្រប់គ្រងការអប់រំកុមារតូច ការអប់រំកម្រិតបឋមសិក្សា និងការអប់រំក្រៅប្រព័ន្ធ មកឲ្យរដ្ឋបាលស្រុក ខណ្ឌវិញ។​ ការផ្ទេរនេះ នឹងត្រូវធ្វើឡើងជាតំណាក់កាល។​ ចាប់ផ្តើមនៅក្នុងឆ្នាំ២០១៦ ការផ្ទេរលើកតំបូង នឹងកើតឡើងនៅក្នុងស្រុក ខណ្ឌ​ ចំនួន១៤ របស់ខេត្តបាត់ដំបង។

ក្រោមការគ្រប់គ្រងដោយផ្ទាល់របស់ក្រសួងមហាផ្ទៃ សាលាជាតិរដ្ឋបាលមូលដ្ឋាន ត្រូវបានបង្កើតឡើងដើម្បីអភិវឌ្ឍ និងពង្រឹងសម្ថភាពរបស់មន្រ្តីរាជការ ក្រុមប្រឹក្សានៃរដ្ឋបាលថ្នាក់ក្រោមជាតិ សិស្ស និស្សិត និងអ្នកពាក់ព័ន្ធ និងដើម្បីធ្វើការសិក្សាស្រាវជ្រាវអំពីអភិបាលកិច្ចថ្នាក់ក្រោមជាតិ។​ សាលាជាតិរដ្ឋបាលមូលដ្ឋាន មានតួនាទីមួយចំនួន រួមមានរៀបចំ និងបង្កើតកម្មវិធីសិក្សា ផ្តល់វគ្គហ្វឹកហ្វឺនខ្លី និងមធ្យម និងសិក្សាស្រាវជ្រាវ និងផ្តល់អនុសាសន៍ជុំវិញគោលនយោបាយគ្រប់គ្រងនៅថ្នាក់ក្រោមជាតិ។

ត្រឹមខែ​កញ្ញា ឆ្នាំ ២០១៥ ឧបករណ៍​ត្រួត​ពិនិត្យតាមដាន និង​វាយតម្លៃ​ត្រូវបាន​បំពាក់​នៅក្នុងខណ្ឌទាំងអស់​នៅភ្នំពេញ សំរាប់ធ្វើការសាកល្បងដើម្បី​ឲ្យការគ្រប់គ្រងការងារ​នៅថ្នាក់​ស្រុក/ក្រុង/ខណ្ឌ​កាន់តែប្រសើរឡើង។ ឧបករណ៍ត្រួត​​ពិនិត្យ​តាម​ដាន និងវាយតម្លៃនេះ​នឹង​អនុញ្ញាត​ឱ្យ​ស្រុក/ក្រុង/ខណ្ឌ​កត់ត្រា​រាល់សកម្មភាព​ជាមួយ​សូចនាករជាក់លាក់ ដើម្បី​វាយតម្លៃ​ភាពជោគជ័យ​របស់ខ្លួន។

ក្រុមការងារយេនឌ័រ​ត្រូវបានបង្កើតឡើង តាមរយៈ​សេចក្តីសម្រេច​ជាផ្លូវការរបស់ គ.ជ.អ.ប ដើម្បី​សម្របសម្រួល​សកម្មភាព​ទាក់ទង​នឹង​យេនឌ័រ។ យុទ្ធសាស្ត្រ​នេះ​ត្រូវបានបង្កើតឡើង ដើម្បី​សម្រួល​ដល់​រដ្ឋបាល​ថ្នាក់ក្រោម​ជាតិក្នុងការ​លើកស្ទួយ​ស្ត្រី បញ្ជ្រាបយេនឌ័រ​ទៅក្នុង​គោល​នយោបាយ​រដ្ឋបាល​ថ្នាក់ក្រោមជាតិ​ និង​ជំរុញការផ្តល់​ការងារដល់​ស្ត្រីនៅ​ក្នុង​រដ្ឋបាល​ថ្នាក់ក្រោមជាតិ។ ទាក់ទង​នឹងការផ្តល់​ការងារ គោលដៅ គឺត្រូវមាន​ស្ត្រី ២០ ភាគរយ​ក្នុងចំណោម​អ្នក​ធ្វើសេចក្តីសម្រេច​ចិត្តថ្នាក់​ខេត្ត​/រាជធានី​ (ប្រធាននាយកដ្ឋាន ប្រធាន​ផ្នែក) និង​មានស្ត្រី ២៥ ក្នុងចំណោម​អ្នក​ធ្វើសេចក្តីសម្រេច​ចិត្ត​ថ្នាក់​ស្រុក/​ក្រុង/ខណ្ឌ នៅឆ្នាំ ២០១៨។ ចំនួនស្រ្តីដែលមានតួនាទីជាអ្នកធ្វើការសម្រេចចិត្តបានកើនពី ១២.៩៦ ភាគរយក្នុងឆ្នាំ ២០១៣ ទៅ ១៣.៩៣ ភាគរយ​ក្នុងឆ្នាំ ២០១៤។

សៀវភៅណែនាំ​ស្ដីពីការរៀបចំគម្រោង​​​ស្រុក/ក្រុង/ខណ្ឌ​ ដែល​ចាំបាច់​សម្រាប់​ការអនុវត្ត​មូលនិធិ​ស្រុក/ក្រុង ត្រូវបានបញ្ចប់​នៅ​ខែ​មិថុនា ឆ្នាំ ២០១៤ ហើយ​ការបណ្ដុះបណ្ដាល​ត្រូវបាន​បញ្ចប់​ក្នុង​អំឡុងពេល​ត្រីមាសទីបី។ សៀវភៅណែនាំ​ជាច្រើនត្រូវ​បាន​រៀបចំឡើង​សម្រាប់​នីតិវិធី​ប្រតិបត្តិថ្នាក់ស្រុក ដូចជា រដ្ឋបាល ការគ្រប់គ្រង​ធនធានមនុស្ស និង មុខងារ​សំខាន់ៗ​​ទាំងអស់​នៅក្រោម​ស្រុក/ក្រុង​។ សៀវភៅ​ណែនាំទាំង​​នោះមានព័ត៌មានអំពី ​ការគាំទ្រ​ឃុំ/សង្កាត់ ការចូលរួមរបស់​ប្រជាពលរដ្ឋ លក្ខន្តិកៈ និង​សេចក្តីសម្រេច កិច្ចប្រជុំ រដ្ឋបាល​ទូទៅ ការគ្រប់គ្រងការិយាល័យ ការគ្រប់គ្រង​បុគ្គលិក និង​ហិរញ្ញវត្ថុ ការរៀបចំគម្រោង និង​ការត្រួតពិនិត្យផ្នែក​បច្ចេកទេស ការគ្រប់គ្រង​លទ្ធកម្ម និង​កិច្ច​សន្យា និង​ការ​ពិនិត្យ​តាមដាន និង​វាយតម្លៃ​គម្រោង និង​លទ្ធកម្ម។ សិក្ខាសាលា​មួយចំនួន​ត្រូវបាន​រៀបចំឡើង ហើយ​សៀវភៅ​ណែនាំនេះ​រង់ចាំ​ការ​ត្រួតពិនិត្យ​ចុងក្រោយ​ពី​ក្រសួង​មហាផ្ទៃ មុននឹងដាក់ស្នើ​សុំការអនុម័ត។

ត្រឹម​ខែមេសា ឆ្នាំ ២០១៤ ខេត្ត និង​រាជធានីទាំង ២៥ បាន​បង្កើតសមាគម​​ក្រុមប្រឹក្សា​​ស្រុក/ក្រុង/ខណ្ឌ និង​ឃុំ/សង្កាត់។ សមាគមថ្នាក់ខេត្ត​នៃ​សមាគម​ក្រុមប្រឹក្សា​​​ស្រុក/ក្រុង/ខណ្ឌ និង​ឃុំ/សង្កាត់ នឹង​ត្រូវបានបញ្ចូល​ទៅក្នុង​សម្ព័ន្ធ​ជាតិ​ក្រុមប្រឹក្សា​​ស្រុក/ក្រុង/ខណ្ឌ ​និងឃុំ/សង្កាត់។