ការបង្ហាញចំណាប់អារម្មណ៍

សេចក្តីផ្តើម

កម្មវិធីពន្លកចំណេះដំណាក់កាលទី ២៖ ទិន្នន័យ និងការពិភាក្សា​​​ដើម្បី​ការអភិវឌ្ឍនៅកម្ពុជា គឺជាគំនិតផ្តួចផ្តើមរយៈពេលបួនឆ្នាំដែលទទួលបានជំនួយ​មូលនិធិពី​ក្រសួងការបរទេស និងពាណិជ្ជកម្មអូស្ត្រាលី ចាប់​ពីឆ្នាំ ២០២៣ ដល់ឆ្នាំ ២០២៧។ គោលបំណងចម្បងរបស់កម្មវិធីនេះ​គឺដើម្បីលើកកម្ពស់គុណភាព និងភាពពាក់ព័ន្ធនៃការ​ធ្វើ​សេចក្តី​សម្រេចលើគោលនយោបាយសាធារណៈដោយរាជរដ្ឋាភិបាលកម្ពុជា។

ដោយឈរលើជោគជ័យនៃកម្មវិធីពន្លកចំណេះដំណាក់កាលទី ១  (២០១៩-២០២៣)​ ដែលមានគោលបំណងពង្រឹងសមត្ថភាពស្ថាប័នសិក្សា​ស្រាវជ្រាវ​នៅ​កម្ពុជា ក្នុងការផលិតការស្រាវជ្រាវដែលផ្តល់មូលដ្ឋាន​ជាព័ត៌មានដល់ការតាក់តែងគោលនយោបាយសាធារណៈ កម្មវិធី​ពន្លកចំណេះដំណាក់កាលទី ២ (២០២៣-២០២៧)​ ខិតខំធានាថា   ការធ្វើសេចក្តី​សម្រេចទាំងនេះផ្អែកលើទិន្នន័យ​    និងការពិភាក្សា​ប្រកប​ដោយ​​បរិយាបន្ន។ កម្មវិធីនេះ ផ្តោតលើសារៈសំខាន់នៃការផ្តល់ព័ត៌មានដែលមានគុណភាពខ្ពស់ដល់អ្នកតាក់តែងគោលនយោបាយកម្ពុជាដើម្បីគាំទ្រដល់​ដំណើរការនេះ។ កម្មវិធីពន្លកចំណេះដំណាក់កាលទី ២ មានបំណងសម្រេច​បានការទទួលយក និងការវាយតម្លៃខ្ពស់​ក្នុងចំណោមអ្នកតាក់តែងគោលនយោបាយ និងភាគីពាក់ព័ន្ធ នូវ​ការពិភាក្សា​ប្រកប​ដោយ​​បរិយាបន្ន និងការធ្វើសេចក្តីសម្រេចផ្អែកលើទិន្នន័យ​ ដោយធ្វើឱ្យ​ការអនុវត្តទាំងនេះក្លាយ​ជាបទដ្ឋាន​មួយនៅកម្ពុជា។

ក្នុងការលើកកម្ពស់បរិយាបន្នក្នុងដំណើរការតាក់តែងគោលនយោបាយ កម្មវិធី​ពន្លកចំណេះកំពុងរៀបចំកម្មវិធីពិធីពាន​រង្វាន់បរិយាបន្ន  ដើម្បីទទួលស្គាល់កិច្ចខិតខំប្រឹងប្រែងដែលលើកកម្ពស់ ការស្រាវជ្រាវប្រកប​ដោយ​បរិយាបន្ន   ការផ្សព្វផ្សាយលទ្ធផលស្រាវជ្រាវប្រកប​ដោយ​បរិយាបន្ន  និង ការពិភាក្សា​ប្រកប​ដោយ​បរិយាបន្ន ក្នុងវិស័យស្រាវជ្រាវ​នៅកម្ពុជា។ ពាន​រង្វាន់ទាំងនេះនឹងផ្តល់កិត្តិយសដល់បុគ្គល អង្គការ និងស្ថាប័នដែលបានបង្ហាញការប្តេជ្ញាចិត្តជា​ពិសេសចំពោះបរិយាបន្ន តាមរយៈការ​ទទួលស្គាល់ និងការ​ដោះស្រាយតម្រូវការរបស់ក្រុមផ្សេងៗ និងការ​លើកកម្ពស់សមធម៌ ការ​បង្កលក្ខណៈងាយស្រួល​ និងការចូលរួមប្រកបដោយអត្ថន័យរបស់ក្រុមផ្សេងៗ។

គោលបំណងនៃពាន​រង្វាន់ទាំងនេះ​

ការ​ប្រគល់​ពាន​រង្វាន់ទាំងនេះគឺដើម្បីទទួលស្គាល់ និងលើកទឹកចិត្តការងារដែលបង្ហាញពីបរិយាបន្ន តាមរយៈការស្រាវជ្រាវប្រកបដោយនវានុវត្តន៍ លទ្ធផលស្រាវជ្រាវដែលអាចចូលប្រើប្រាស់បាន និងប្រកប​ដោយ​បរិយាបន្ន ឬការពិភាក្សា​ដែលដោះស្រាយតម្រូវការ និងទស្សនៈយល់ឃើញ​របស់ក្រុមផ្សេងៗ ក្នុងដំណើរការគោលនយោបាយនៅថ្នាក់ក្រោមជាតិ​ ឬថ្នាក់ជាតិ។ ពានរង្វាន់ទាំងនេះមានគោលបំណង៖

• បង្ហាញពីកិច្ចខិតខំប្រឹងប្រែងជា​ពិសេសដែលលើកកម្ពស់បរិយាបន្ន និងការ​បង្កលក្ខណៈងាយស្រួល​។
• បំផុសគំនិត និងលើកទឹកចិត្តអ្នកដទៃឱ្យដាក់បញ្ចូលបរិយាបន្នទៅ​ក្នុងការងាររបស់ពួកគេ។
• ផ្តល់វេទិកាសម្រាប់ចែករំលែកការអនុវត្តល្អបំផុតក្នុងការស្រាវជ្រាវ ការផ្សព្វផ្សាយ​ និងការពិភាក្សាប្រកបដោយបរិយាបន្ន។

ប្រភេទពាន​រង្វាន់

ពានរង្វាន់ការស្រាវជ្រាវប្រកបដោយ​បរិយាបន្ន
ពានរង្វាន់នេះផ្តល់កិត្តិយសដល់អ្នកស្រាវជ្រាវ       និងអង្គការស្រាវជ្រាវ   ដែលផ្តោត​អាទិភាពលើ​បរិយាបន្នក្នុងវិធីសាស្ត្រ ចំណុច​ផ្តោតសំខាន់​ និងអភិក្រម​បែប​សហការរបស់ពួកគេលើសពីប្រធានបទស្រាវជ្រាវ។ ការដាក់បេក្ខភាពគួរតែបង្ហាញពីគំនិតផ្តួចផ្តើមស្រាវជ្រាវ ដែលបានដាក់បញ្ចូលការអនុវត្តបែប​បរិយាបន្នយ៉ាងច្បាស់លាស់​ ដោះស្រាយក្រុមដែលងាយរងគ្រោះ លើកកម្ពស់ការ​បង្កលក្ខណៈងាយស្រួល​ និងបង្កើតលទ្ធផល​ចំណេះដឹងដែលអាចអនុវត្តបានសម្រាប់​បម្រើជា​ប្រយោជន៍ដល់​សហគមន៍ផ្សេងៗ។

ពានរង្វាន់ការផ្សព្វផ្សាយលទ្ធផលស្រាវជ្រាវប្រកប​ដោយ​បរិយាបន្ន
ពានរង្វាន់នេះទទួលស្គាល់វិធីសាស្រ្ត​ផ្សព្វផ្សាយ​ផ្សេងៗសម្រាប់​ការស្រាវជ្រាវ ដែលត្រូវបានបង្កើតឡើងដើម្បីឱ្យមនុស្សគ្រប់រូបអាចចូលប្រើប្រាស់បាន រួមទាំងជនមានពិការភាព និងបុគ្គលដែលមាន​សាវតារ​វប្បធម៌ ឬភាសាផ្សេងៗគ្នា។ ផលិតផល​ដែលមានលក្ខណៈសម្បត្តិ​ រួមបញ្ចូល​ ប៉ុន្តែមិនកំណត់ត្រឹមតែ របាយការណ៍ស្រាវជ្រាវ អត្ថបទសង្ខេបគោលនយោបាយ ក្រាហ្វិកព័ត៌មាន ឯកសារការងារ វីដេអូ និងសេចក្តី​អត្ថាធិប្បាយ នោះទេ។ បេក្ខជនគួរតែបង្ហាញពីរបៀបដែលលទ្ធផលស្រាវជ្រាវរបស់ពួកគេលុបបំបាត់ឧបសគ្គរារាំងការយល់ដឹង ការចូលរួម និងលទ្ធភាព​ទទួលបាន។

ពានរង្វាន់ការពិភាក្សាប្រកប​ដោយ​បរិយាបន្ន
ពានរង្វាន់នេះផ្តល់ជូន​បុគ្គល ឬអង្គការដែលសម្របសម្រួលការពិភាក្សា និងកិច្ច​សន្ទនាដែលមានគោលបំណងបង្រួម​គម្លាត​ និងលើកកម្ពស់ការចូលរួមប្រកបដោយអត្ថន័យរបស់ក្រុមចម្រុះដើម្បីច្បាមយ​កទស្សនៈផ្សេងៗ​​។ បេក្ខជនគួរតែបង្ហាញពីកិច្ចខិតខំប្រឹងប្រែងក្នុងការបង្កើតបរិយាកាសដែលមានសុវត្ថិភាព និង​ការ​គោរព ដែលសំឡេងផ្សេងៗត្រូវបាន​ស្តាប់ និងឱ្យ​តម្លៃ។ នេះអាចរួមបញ្ចូលវេទិកា កិច្ចប្រជុំសហគមន៍ ការពិគ្រោះយោបល់ និងសិក្ខាសាលាដែលលើកកម្ពស់ការចូលរួម និងការផ្លាស់ប្តូរប្រកបដោយអត្ថន័យ។

លក្ខណៈវិនិច្ឆ័យសិទ្ធិចូលរួម

បេក្ខភាពនីមួយៗគួរតែ៖

• បង្ហាញលទ្ធផលជាវិជ្ជមាន​ដែលអាចវាស់វែងបានក្នុងការជំរុញបរិយាបន្នក្នុងវិស័យរបស់ពួកគេ។
• ផ្តល់ឧទាហរណ៍ជាក់លាស់អំពីការងាររបស់ពួកគេ និងវិធីសាស្រ្ត​បែប​បរិយាបន្ននៃ​ការងារ​នោះ​។
• ជាបុគ្គល អង្គការ ឬស្ថាប័ន។
• ជាពលរដ្ឋខ្មែរ អង្គការ ឬស្ថាប័នក្នុងស្រុក។
• ជាស្ថាប័នមិនស្វែង​រកប្រាក់ចំណេញ គ្រឹះស្ថានឯកជន គ្រឹះស្ថានសហគ្រាសសង្គម ឬស្ថាប័នសាធារណៈ។

ដំណើរការជ្រើសរើស

ក្រុមអ្នកជំនាញឯករាជ្យ និងចម្រុះ នឹងពិនិត្យការដាក់បេក្ខភាពទាំងអស់ ដោយផ្អែកលើលក្ខណៈវិនិច្ឆ័យដូច​​ខាងក្រោម៖

ពានរង្វាន់ការស្រាវជ្រាវប្រកប​ដោយ​បរិយាបន្ន

1. • ការអនុវត្តការ​ស្រាវជ្រាវប្រកប​ដោយ​បរិយាបន្ន៖ វាយតម្លៃថាតើការស្រាវជ្រាវដាក់បញ្ចូលវិធីសាស្ត្របែប​បរិយាបន្ន និងពិចារណាលើទស្សនៈផ្សេងៗបានល្អកម្រិតណា។
   • វិសាលភាពនៃចំណុច​ផ្តោតក្នុង​ការស្រាវជ្រាវ៖ វាយតម្លៃកម្រិតដែលការស្រាវជ្រាវដោះស្រាយបញ្ហាពាក់ព័ន្ធនឹងសហគមន៍ដែលងាយរងគ្រោះ។
   • លទ្ធភាពទទួលបានលទ្ធផល​រកឃើញ៖ វាយតម្លៃលទ្ធភាពរបស់ក្រុមគោលដៅផ្សេងៗក្នុងការ​ទទួលបានលទ្ធផល​រកឃើញពី​ការស្រាវជ្រាវ​។

 ពានរង្វាន់ការផ្សព្វផ្សាយលទ្ធផលស្រាវជ្រាវប្រកប​ដោយ​បរិយាបន្ន

1. • ការ​បង្កលក្ខណៈងាយស្រួល ​ និងភាពអាចប្រើប្រាស់បាន៖   វាយតម្លៃកម្រិតនៃការ​បង្កលក្ខណៈងាយ​ស្រួល​សម្រាប់ជនមានពិការភាព  និងបរិយាបន្នសម្រាប់ក្រុមងាយរងគ្រោះដទៃទៀត។
   • ភាពច្បាស់លាស់នៃខ្លឹមសារ និងការរចនា៖ វាយតម្លៃភាពច្បាស់លាស់នៃការរចនា និងប្រសិទ្ធភាពក្នុងការកាត់បន្ថយឧបសគ្គរារាំង​ការយល់ដឹងរបស់ក្រុមចម្រុះដទៃទៀត។
   • ការគ្របដណ្តប់​ដល់ និងការជំរុញ​ការ​ចូលរួម៖ វាស់វែងការគ្របដណ្តប់​ដល់ដែលបានបង្ហាញ ឬអាច​ស្តែង​ឱ្យឃើញ​ និងកម្រិតនៃការជំរុញការ​ចូលរួមជាមួយក្រុមផ្សេងៗ។

ពានរង្វាន់ការពិភាក្សាប្រកប​ដោយ​បរិយាបន្ន

1. • ការបង្កើតបរិយាកាសបែប​បរិយាបន្ន៖ វាយតម្លៃប្រសិទ្ធភាពរបស់បេក្ខជនក្នុងការលើកកម្ពស់បរិយាកាសដែលមានសុវត្ថិភាព និងបរិយាបន្នសម្រាប់ការពិភាក្សា។
   • ភាពចម្រុះនៃសំឡេង៖ វាយតម្លៃកម្រិតដែលទស្សនៈផ្សេងៗគ្នាត្រូវបានដាក់បញ្ចូល និងឱ្យ​តម្លៃ។
   • ការចូលរួមប្រកបដោយអត្ថន័យ៖         វាយតម្លៃកម្រិតនៃការចូលរួមក្នុងការដោះស្រាយគម្លាតនៃឥទ្ធិពលរបស់អ្នកចូលរួម និងលើកកម្ពស់ការចូលរួមប្រកបដោយអត្ថន័យរបស់ក្រុមផ្សេងៗក្នុងការពិភាក្សា ទាំងក្នុងនាមជាវាគ្មិន និងអ្នកចូលរួម។

 ដំណើរការដាក់បេក្ខភាព និងការជ្រើសរើស

• ការប្រកាសស្វែងរកបេក្ខភាព៖ ចាប់ពីថ្ងៃទី១១ ខែធ្នូ ឆ្នាំ២០២៤ រហូតដល់ថ្ងៃទី៣១​ ខែមករា ឆ្នាំ២០២៥
• លក្ខខណ្ឌចូលរួម៖ សូមផ្ញើ​ ទម្រង់ដាក់បេក្ខភាព  ឬ វីដេអូ មកកាន់កម្មវិធីពន្លកចំណេះ ដោយបញ្ចូលសេចក្តីសង្ខេបនៃសមិទ្ធផលរបស់បេក្ខជន និងផ្តល់ឯកសារគាំទ្រផ្សេងៗ ដូចជា វីដេអូសក្ខីកម្ម ភស្តុតាងនៃការសម្រេចបានលទ្ធផលផ្លែផ្កា​ ឬគំរូនៃការងារ ជាដើម។
• ដំណើរការជ្រើសរើសបឋម និងវិនិច្ឆ័យ៖ ចាប់ពីថ្ងៃទី១ ដល់ថ្ងៃទី២៨ ខែកុម្ភៈ ឆ្នាំ២០២៥
• ពិធីប្រគល់ពានរង្វាន់បរិយាបន្ន៖ នឹងរៀបចំឡើងនៅចុងខែមីនា​ ឆ្នាំ២០២៥

ពិធីប្រគល់ពានរង្វាន់បរិយាបន្ន

អ្នកឈ្នះពានរង្វាន់នឹងត្រូវបានប្រកាស និងអបអរសាទរក្នុងពិធីប្រគល់ពានរង្វាន់បរិយាបន្ន ដែលនឹង​ប្រារព្ធឡើង​ដើម្បីលើកកម្ពស់បរិយាបន្ន​ និងការចែករំលែកដំណើររឿងដែលបំផុសគំនិតនានា​។ អ្នកឈ្នះពានរង្វាន់នឹងមានឱកាសបង្ហាញការងាររបស់ពួកគេដល់ទស្សនិកជនដែលជាមិត្តភក្តិ អ្នកដឹកនាំ និងភាគីពាក់ព័ន្ធ ដើម្បី​លើកស្ទួយ​ការទទួលស្គាល់ និងឥទ្ធិពលកាន់តែទូលំទូលាយនៃការរួមចំណែករបស់ពួកគេ។

សូមចុចតំណភ្ជាប់នេះសម្រាប់ ទម្រង់ដាក់បេក្ខភាពសម្រាប់ពានរង្វាន់បរិយាបន្ន

សម្រាប់ព័ត៌មានលម្អិតបន្ថែម និងទម្រង់ដាក់បេក្ខភាព សូមចូលទៅកាន់​គេហទំព័ររបស់យើង ឬទាក់ទងក្រុមការងាររបស់យើង តាមរយៈអ៊ីមែល ponlok.chomnes@asiafoundation.org ឬទូរសព្ទលេខ 092 168 543។